បទល្មើស

កំពង់ស្ពឺ ៖ យុវជនច្រើននាក់បាននាំខ្លួន យកទៅធ្វើតេស្តទឹកនោមដើម្បីស្វែងរកសារធាតុញៀន បន្ទាប់ពីកម្លាំងសមត្ថកិច្ចចុះបង្ក្រាបក្លឹបកម្សាន្តរាត្រីមួយកន្លែងយីហោ «ម៉ាស្ទ័រក្លឹប» ដែលស្ថិតនៅភូមិសំណង់ សង្កាត់រកាធំ ក្រុងច្បារមន។

មន្ត្រីនគរបាលខេត្តកំពង់ស្ពឺបានឲ្យដឹងថា បានបើកប្រតិបត្តិការទ្រង់ទ្រាយធំបង្ក្រាបក្លឹបម៉ាស្ទ័រ ហើយបានឃាត់ មនុស្សចំនួន ១៦៤នាក់ភាគច្រើនជាយុវជន និងនាំយកទៅធ្វើតេស្តទឹកនោមដើម្បីស្វែងរកសារធាតុញៀន។ មន្ត្រីបន្តថា ប្រតិបត្តិការនេះធ្វើឡើងនៅវេលាម៉ោងជាង ១រំលងអាធ្រាត្រ ចូលរួមដោយកម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលការិយាល័យអន្តរាគមន៍ និងកម្លាំងនគរបាលអធិការដ្ឋានក្រុងច្បារមន និងមានការសម្របសម្រួលពីតំណាងអយ្យការ។ ជាលទ្ធផលឃាត់មនុស្សចំនួន ១៦៤នាក់ (ស្រី ៦២នាក់) យកទៅធ្វើតេស្តទឹកនោមហើយរកឃើញថា មានផ្ទុកសារសារធាតុញៀនចំនួន ៣០នាក់ (ស្រី ៧នាក់) ដែលត្រូវចាត់វិធានការតាមនីតិវិធីបន្តទៀត៕