អាជ្ញាធរខេត្តកោះកុង អបអរសាទការទទួលបានជ័យលាភីអង្គភាពផ្តល់សេវាសាធារណៈគំរូសុខាភិបាល និងវិស័យអប់រំទូទាំងប្រទេស

កោះកុង៖ លោកជំទាវ មិថុនា ភូថង អភិបាលខេត្តកោះកុង នៅថ្ងៃទី១៤ ខែសីហា នេះ រៀបចំពិធីអបអរសាទរទទួលជ័យលាភីអង្គភាពផ្តល់សេវាសាធារណៈគំរូវិស័យអប់រំ និងសុខាភិបាល មន្ទីរពេទ្យបង្អែកខេត្តកោះកុង ជ័យលាភីលេខ១ មន្ទីរពេទ្យបង្អែកស្រុកស្រែអំបិលជ័យលាភីលេខ៦ និងវិទ្យាល័យកោះស្តេចជ័យលាភីលេខ៦។

លោកជំទាវអភិបាលខេត្ត គូសបញ្ជាក់ថា ការទទួលបានលទ្ឋផលប្រកួតប្រជែងល្អប្រសើរកម្រិតថ្នាក់ជាតិនេះ ជាមោទនភាពយ៉ាងខ្លាំងចំពោះខេត្តលើកកិច្ចការងារវិស័យសុខាភិបាល និងវិស័យអប់រំ។
លោកជំទាវ ក៏ស្នើដល់ប្រធានអង្គភាពសេវាសាធារណៈទាំងពីរបន្តរិះរកវិធីសាស្រ្តថែមទៀត ដើម្បីបន្តដណ្តើមយកម្ចាស់ចំណាត់ថ្នាក់លេខ១ នៅឆ្នាំក្រោយៗទៀត។
លោក ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានឱ្យដឹងថា មុននឹងមន្ទីរពេទ្យឈានដល់ដំណាក់កាលនៃការប្រកាសទទួលស្គាល់ជាជ័យលាភីឯកជាអង្គភាពផ្តល់សេវាសាធារណៈគំរូក្នុងវិស័យសុខាភិបាលនេះដែរ គឺថ្នាក់ដឹកនាំមន្ទីរពេទ្យ និងមន្ត្រីក្រោមឱវាទទាំងអស់បានខិតខំ ប្រឹងប្រែងយ៉ាង សកម្ម ដោយដៃម្ខាងបម្រើប្រជាពលរដ្ឋ អ្នកជំងឺ ដៃម្ខាងចូលរួមរៀបចំ កែលំអហេដ្ឋារចនាសម្ព័នការងារ អនាម័យ និងកាងារជាច្រើនទៀត…។ល។ដើម្បីអភិវឌ្ឍអង្គភាពនេះឲ្យកាន់តែល្អប្រសើរ និងត្រូវឆ្លងកាត់ការចូលរួមវាយតម្លៃយ៉ាងសុក្រិត យុត្តិធម៌ ពីអន្តរក្រសួង ជាច្រើនដំណាក់កាល។ក្នុងនោះដែរ លោកក៏ប្តេជ្ញាចិត្តរក្សាចំណាត់ថ្នាក់ទទួលពាននៅឆ្នាំក្រោយទៀត សម្រាប់គុណភាពវិស័យសុខាភិបាល។
មន្ទីរពេទ្យខេត្តកោះកុង សូមថ្លែងអំណរគុណយ៉ាងជ្រាលជ្រៅបំផុតចំពោះលោកជំទាវអភិបាលខេត្ត ព្រមទាំង ថ្នាក់ដឹកនាំខេត្តទាំងអស់ ថ្នាក់ដឹកនាំមន្ទីរសុខាភិបាលខេត្ត និងគណ:កម្មការវាយតំលៃអង្គភាពផ្តល់សេវាសាធារណៈគំរូថ្នាក់ខេត្ត ថ្នាក់ជាតិ និងភាគីពាក់ព័ន្ធទាំងអស់ដែលបានចូលរួម និងសម្រេចលទ្ធផលយ៉ាងសុក្រិត្យ និងយុត្តិធម៌ ដល់មន្ទីរពេទ្យខេត្តកោះកុង រហូតដល់មានឱកាសទទួលបានពានរង្វាន់ជ័យលាភី និងវិញ្ញាបនបត្រ ពីសម្តេចតេជោប្រមុខរាជរដ្ឋាភិបាល។
ក្រៅពីមន្ទីរពេទ្យបង្អែកខេត្ត ដែលជាប់ជ័យលាភី ក៏មានមន្ទីរពេទ្យបង្អែកស្រុកស្រែអំបិលជ័យលាភីលេខ៦ និងវិទ្យាល័យកោះស្តេចជ័យលាភីលេខ៦។
គួររម្លឹកថា កាលពីថ្ងៃទី៧ ខែសីហា ឆ្នាំ ២០១៩ ទើបកន្លងផុតទៅថ្មីៗនេះ មន្ទីរពេទ្យខេត្តកោះកុង មានកិត្តិយស និងមានមោទនភាពក្រៃលែង ដែលទទួលបានពានរង្វាន់ជ័យលាភីលេខ១ នៃមន្ទីរពេទ្យកម្រិត២(CPA2) ទូទាំងប្រទេស។
ជាលទ្ធផលដ៏ត្រចះត្រចង់នេះ គឺជាកិត្តិយសដ៏ធំមួយរបស់ មន្ទីរពេទ្យខេត្តកោះកុង ផ្ទាល់ មន្ទីរសុខាភិបាល ក៏ដូចជាវិស័យសុខាភិបាលក្នុងខេត្តកោះកុង និងសម្រាប់ខេត្តកោះកុងទាំងមូល៕