បទល្មើស

ប្រជាពលរដ្ឋអស់សង្ឃឹមទៅលើសមត្ថកិច្ចប៉ុស្តិ៍នគរបាលសង្កាត់បារាយណ៍ដែលបណ្ដោយអោយល្បែងសុីសងដុះរីកដូចផ្សិតដោយពុំមានចំណាត់ការបង្ក្រាប

ខេត្តតាកែវ៖ ប្រជាពលរដ្ឋក្នុងសង្កាត់បារាយណ៍អស់សង្ឃឹមទៅលើសមត្ថកិច្ចប៉ុស្តិ៍សង្កាត់បារាយណ៍ទៀតហើយ ខណៈដែលល្បែងសុីសងឡូតូ និងមាន់ជល់តាមប្រព័ន្ធអនឡាញរីកដូចផ្សិតក្នុងមូលដ្ឋាន មិនដែលឃើញសមត្ថកិច្ចបង្ក្រាបនោះទេ ទុកអោយមេល្បែងទាំងនោះសប្បាយកើបលុយពីប្រជាពលរដ្ឋខ្លួនយ៉ាងគគ្រឹកគ្រេងតាមភូមិនីមួយៗ។

យោងតាមប្រភពពីប្រជាពលរដ្ឋ បានបង្ហើបប្រាប់អង្គភាពយើងអោយដឹងថា៖ទីតាំងល្បែងក្នុងសង្កាត់បារាយណ៍ក្រុងដូនកែវខេត្តតាកែវ ពីមុនដាក់តែមួយគ្រឿងទេក្នុង១ទីតាំង ក្រោយពីមានព័ត៌មានចុះផ្សាយម្ដងរួចមក បានស្ងាត់ចំនួន២ថ្ងៃក៍បើកវិញដាក់មួយគោលដៅរហូដល់២គ្រឿងលើសដើម ចំណែកសមត្ថកិច្ចប៉ុស្តិ៍សង្កាត់បារាយណ៍វិញ ដេកលក់បាត់អស់ ទុកអោយមេល្បែងទាំងនោះធ្វើព្យុះភ្លៀងកើបលុយពីប្រជាពលរដ្ឋក្នុងមូលដ្ឋានយ៉ាងសប្បាយ ដោយគ្មានខ្លាចរអារនិងច្បាប់បន្តិចសោះឡើយ យើងដឹងហើយថាល្បែងគឺជាដើមចម បង្កអោយមានអំពើ លួច ឆក់ ប្លន់និងហឹង្សាជាដើម។ល។

ប្រជាពលរដ្ឋបានបន្តលើកឡើងទៀតបែបកំប្លែងថា(ស្រុកខ្ញុំកាហ្វេឥលូវថ្លៃណាស់១កែវតម្កៃ១០ម៉ឺនទៅ២០ម៉ុឺន អាចដល់៥០ម៉ុឺនក៍មានដែរ)សម្រាប់ហូបកាហ្វេដែលមានទីតាំងដាក់មាន់ជល់និងឡូតូ អោយតែម៉ាកៗនេះរលាយហើយស្រុកខ្ញុំ អោយប្រជាពលរដ្ឋមានបានយ៉ាងម៉េចទៅ បើល្បែងសុីសងមកដល់កាំជណ្ដើរផ្ទះច្រើនយ៉ាងនេះ តើអនាគត់កូនចៅទៅជាយ៉ាងណា បើសមត្ដកិច្ចសំងំឈឹងមិនអើពើ ឬមួយក៍បានផលប្រយោជន៍ពីមេល្បែងអស់ទាំងនោះបានជាមិនហ៊ានបង្ក្រាប។

ទោះបីយ៉ាងណា តាមរយះអង្គភាពសារព័ត៌មានយើង ពួកគាត់សូមសុំណូមពរដល់ថ្នាក់លើដែលពាក់ព័ន្ធក្នុងការបង្ក្រាប សូមជួយចាត់វិធានការលុបបំបាត់រាល់ល្បែងសុីសងគ្រប់ប្រភេទក្នុងមូលដ្ឋានផង ដើម្បីស្របតាមគោលនយោបាយភូមិឃុំមានសុវត្តិភាព៧ចំណុចដែលបានដាក់ចេញដោយក្រសួងមហាផ្ទៃ ឬបទបញ្ជាផ្ទៃក្នុង ០០៦ របស់អគ្គស្នងការនគរបាលជាតិ។