សន្តិសុខសង្គម

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្ត្រីនាំយកព្រះរាជអំណោយដ៏ថ្លៃថ្លារបស់ សម្តេចព្រះមហាក្សត្រី ព្រះវររាជមាតាជាតិខ្មែរ ជូនដល់ស្ត្រីមានផ្ទៃពោះ និងស្ត្រីទេីបសម្រាលកូន ១២២គ្រួសារ រស់នៅខេត្តកំពង់ស្ពឺ

កំពង់ស្ពឺ) ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃព្រហស្បតិ៍ ១១រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ២៤ ខែតុលា ឆ្នាំ២០១៩ នេះ បានចាត់ឱ្យមន្ត្រីនាំយកព្រះរាជអំណោយដ៏ថ្លៃថ្លារបស់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា រួមជាមួយនឹងអំណោយរបស់កាកបាទក្រហមកម្ពុជា ផ្តល់ជូនស្ត្រីមានផ្ទៃពោះ និងស្ត្រីទេីបសម្រាលកូន ដែលមានជីវភាពលំបាកចំនួន ១២២គ្រួសារ រស់នៅឃុំភក្តី និងឃុំផុង នៃស្រុកបរសេដ្ឋ ខេត្តកំពង់ស្ពឺ។

ក្នុងនាម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លោកជំទាវ ម៉ែន នារីសោភ័គ អគ្គលេខាធិការរងទី១ បានពាំនាំនូវព្រះរាជបន្ទូលរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ដែលព្រះអង្គបានផ្តាំផ្ញេីសួរសុខទុក្ខ ក្តីនឹករលឹក អាណិតស្រឡាញ់ដ៏ជ្រាលជ្រៅ និងតែងតែគិតគូរពីការរស់នៅរបស់ប្រជានុរាស្ត្រដែល ជាកូន ជាចៅ ចៅទួតរបស់ព្រះអង្គជានិច្ច។ ទន្ទឹមនឹងនេះ លោកជំទាវអគ្គលេខាធិការរងទី១ បានគូសបញ្ជាក់ថា ជាមួយនឹងការឧបត្ថម្ភគាំទ្រពីសំណាក់សប្បុរសជនជាតិ-អន្តរជាតិ ជាពិសេសក្នុងទិវា ៨ ឧសភា នោះ កាកបាទក្រហមកម្ពុជា តែងតែទទួលបានការប្រោសព្រះរាជូបត្ថម្ភនូវព្រះរាជទ្រព្យចំនួន ១,០០០ដុល្លារអាមេរិក ជារៀងរាល់ខែ ពីព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះរាជទ្រព្យចំនួន ៣,០០០ដុល្លារអាមេរិក ជារៀងរាល់ត្រីមាស ពី សម្តេចព្រះមហាក្សត្រី ព្រះវររាជមាតាជាតិខ្មែរ ព្រមទាំងការប្រោសប្រទានក្នុងឱកាសផ្សេងៗទៀតផង។

ជាមួយគ្នានេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងនាមជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដេីម្បីសុខភាពស្ត្រីនិងកុមារ ក៏សូមផ្តាំផ្ញេីជូនប្រជាពលរដ្ឋទាំងអស់ ជាពិសេស បងប្អូនក្មួយៗជាស្ត្រីមានផ្ទៃពោះ និងអ្នកដែលទេីបសម្រាលកូន ត្រូវយកចិត្តទុកដាក់ថែទាំសុខភាពឱ្យបានល្អ ពិនិត្យផ្ទៃពោះឱ្យបានទៀងទាត់ អនុវត្តតាមការណែនាំរបស់គ្រូពេទ្យ និងត្រូវសម្រាលកូននៅមណ្ឌលសុខភាពដែលមានពេទ្យ-ឆ្មបជំនាញ ដេីម្បីសុវត្ថិភាព និងទប់ស្កាត់ការចម្លងជំងឺនានា។ ជាមួយគ្នានេះ សូមបំបៅកូនដោយទឹកដោះម្តាយយ៉ាងហោចណាស់ឱ្យបាន៦ខែដំបូង និងផ្តល់អាហារូបត្ថម្ភដល់កុមារឱ្យបានគ្រប់គ្រាន់ ជាពិសសត្រូវថែទាំនិងចាក់ថ្នាំបង្ការជំងឺ ដល់កុមារឱ្យបានទៀងទាត់ទៅតាមកាលកំណត់របស់សៀវភៅណែនាំ។

បន្ថែមពីនេះ លោកជំទាវអគ្គលេខាធិការរងទី១ ក៏បានពាំនាំនូវសេចក្តីអំពាវនាវពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជាពលរដ្ឋទាំងអស់ សូមបន្តខិតខំប្រកបរបរចិញ្ចឹមជីវិតដោយក្តីរីករាយ និងចូលរួមថែរក្សា ការពារសុខសន្តិភាព ការពារ «ជាតិ សាសនា ព្រះមហាក្សត្រ» ដែលជាបាវចនាជាតិដ៏រុងរឿង ហេីយជៀសវាងរាល់ការឃោសនាអគតិនានាដែលបំផ្លាញសុភមង្គល ភាពសម្បូរសប្បាយរុងរឿងរបស់ប្រជាជន និងប្រទេសជាតិយេីង។

សូមបញ្ជាក់ថា គ្រួសារនីមួយៗទទួលបាន សាប៊ូដុំ ៣ដុំ និងសាប៊ូទឹកបោកខោអាវ ១ដប និងភួយ១ ជាព្រះរាជអំណោយរបស់សម្តេចព្រះមហាក្សត្រី ព្រះវររាជមាតាជាតិខ្មែរ ព្រមទាំងទទួលបាន អង្ករ ៣០គីឡូក្រាម មីយេីង ១កេស ត្រីខ ១០កំប៉ុង ឃីត (មុង ភួយ សារុង ក្រមា អាវយឺត) ១ឃីត និងថវិកា ១ម៉ឺនរៀល ជាអំណោយរបស់កាកបាទក្រហមកម្ពុជា៕