បាត់ដំបង ៖ អគ្គីភ័យបានលេបត្របាក់ផ្ទះអ្នកលក់ចាប់ហួយមួយខ្នងខ្ទេចគ្មានសល់ នៅថ្ងៃទី១៩ ខែវិច្ឆកា ឆ្នាំ២០១៩ វេលាម៉ោង៥ និង០០នាទីទៀបភ្លឺស្ថិតនៅត្រង់ចំណុច ភូមិបឹងរាំង ឃុំធិបតី ស្រុកគាស់ក្រឡ ខេត្តបាត់ដំបង។

លោកវរសេនីយ៍ឯក ប៉ាង ហៀង អធិការនគនរបាលស្រុកគាស់ក្រឡបានប្រាប់ភ្នាក់ងារយើងឲ្យដឹងថា ករណីអគ្គីភ័យនេះបានកើតឡើងនៅចំណុច ភូមិបឹងរំាង ឃុំធិបតី ស្រុកគាស់ក្រឡ ខេត្តបាត់ដំបង បណ្ដាលអោយឆេះតូបលក់ដូរឥវ៉ាន់ចាប់ហួយមួយទំហំ៦គុណ៧ម៉ែត្រធ្វើអំពីឈើប្រក់ស័ង្កសី ។

លោកបន្តទៀតថា ម្ចាស់តូបឈ្មោះ សុំ សាវុន ភេទប្រុស អាយុ៤០មុខរបរលក់ដូរមានទីលំរស់ក្នុងភូមិឃុំកើតហេតុខាងលើ។

នៅក្នុងហេតុការណ៍អគ្គីភ័យឆាបឆេះផ្ទះនេះដែរ សរុបការខូចខាតៈឆេះលុយខ្មែរអស់១០លានរៀល លុយបាតចំនួន២០០០បាត ឥវ៉ាន់ចាប់ហួយសរុបប្រមាណ៨០លានរៀល (ប៉ែតសិបលានរៀល)។

លោកអធិការបញ្ជាក់បន្ថែមថា ក្នុងកិច្ចប្រតិបត្តិការណ៍ជួយសង្គ្រោះនេះដែរបាន ប្រើប្រាស់ឡានពន្លត់អគ្គីភ័យអស់៣ឡានស្មើនឹង១៨គីប និងឡានដឹកទឹករបស់ក្រុមហ៊ុន ណឹម ម៉េង មួយឡានស្មើនឹង១២គីបសរុបប្រើប្រាស់ទឹកអស់៣០ម៉ែត្រគីបផងដែរ។

បើយោងតាមការបញ្ជាក់ពីម្ចាស់ផ្ទះខាងលើ បានប្រាប់សមត្ថកិច្ចថា មុនដំបូងឡើយមូលហេតុ បណ្តាលមកពីភ្លើងចង្រ្កានខ្ទាតចំកាដុងសាំង ដែលនៅជាប់នឹងផ្ទះបាយទើបបានជាមានករណីនេះកើតឡើងតែម្តង តែមិនមានប៉ះពាល់ដល់អាយុជីវិតមនុស្សទេ៕