បាត់ដំបង ​៖ អគ្គិភ័យមួយបានលេបត្របាក់ផ្ទះមួយខ្នងកាលពីវេលាម៉ោង២២ និង៤០នាទី ថ្ងៃទី២៥ ខែវិច្ឆិកា ឆ្នាំ២០១៩ នៅចំណុចក្រុមទី២៤ ស្ថិតក្នុងភូមិឆ្កែកូន ឃុំគោកឃ្មុំ ស្រុកថ្មគោល។

ស​​​​​​​​​​​​​​​​​មត្ថកិច្ចមូលដ្ឋានបានអោយដឹងថា ផ្ទះ​​​​​​​​​​​​​​​​​​ដែលត្រូវភ្លើងឆេះខាងលើមានទំហំ ៦ម៉ែត្រx៧ម៉ែត្រ​ សង់អំពីឈើប្រក់ស័ង្កសី ជញ្ជាំងក្តារ ខូចខាតទាំងស្រុង ដែលមានម្ចាស់ឈ្មោះ សោម វ៉ាន់ដេត ភេទប្រុស អាយុ៣៦ឆ្នាំ រស់នៅភូមិឆ្កែកូន ឃុំគោកឃ្មុំ ស្រុកថ្មគោល ខេត្តបាត់ដំបង ។

ប្រ​ភពពី​​​​​​​​​​​​​​​​កន្លែងកើតហេតុបានអោយដឹងថា ផ្ទះ​ដែលត្រូវបានភ្លើងឆេះខាងលើទំនងអាចគេលួចដុតច្រើនជាងព្រោះនៅមុនពេលកើតហេតុម្ចាស់ផ្ទះពីរនាក់ប្តីប្រពន្ធមិនបាននៅផ្ទះនោះទេ ដោយបានបិទគុប​ភ្លើង និ​ងចាក់សោផ្ទះចោលរួចនាំគ្នាទៅដេកចាំផ្ទះអោយបងប្អូន លុះនៅវេលាម៉ោង២២ និ​ង៤០នាទីក៏ស្រាប់តែមានការភ្ញា​ក់ផ្អើ​លដោយអគ្គិភ័យឆាបឆេះផ្ទះតែម្តង។

​ប្រភពដដែលបានបន្តថា មូលហេតុដែលគេដាក់ការសង្ស័យមានអ្នកលួចដុត ព្រោះកន្លងមកនៅអំឡុងខែ១០ ផ្ទះរងគ្រោះខាងលើមានគេមកលួចចាក់សាំងប៉ុនប៉ងដុតម្តងរួចមកហើយ តែត្រូវបានម្ចាស់ដឹងខ្លួនទាន់ ទើបតែពេលនេះគ្រាដែលម្ចាស់ផ្ទះមិននៅក៏ស្រាប់តែមានអគ្គិភ័យកើតឡើងតែម្តងទាំងដែលម្ចាស់ផ្ទះបានបិទគុបភ្លើងចោលផងនោះ។

​សមត្ថកិច្ចបានបន្តអោយដឹងថា នៅក្នុ​ងហេតុការណ៍គ្រោះអគ្គិភ័យខាងលើនេះដែរ​ ​ក្រោយទទួលបានព័ត៌មានភ្លាមសមត្ថកិច្ចជំនាញបានចេញនាំយករថយន្តពន្លត់អគ្គិភ័យរបស់អធិការចំនួន០១​គ្រឿ​​ងចុះអន្តរាគមន៍ជួយបាញ់ពន្លត់ដោយប្រើប្រាស់ទឹកអស់​មួយឡានទើបអាចគ្រប់គ្រងស្ថាន​ការទាំងស្រុងមិនអោយឆេះរាលដាលដល់ផ្ទះអ្នកជិតខាង ។

​ក្រោយ​កើតហេតុសមត្ថកិច្ចបានសាកសួរ ​និងធ្វើកំណត់ហេតុសរុបការខូចខាតរួមមាន៖ ​ផ្ទះចំនួន០​១ខ្នងអស់ទាំងស្រុង, ម៉ូតូចំនួន០២គ្រឿង, គោយន្តកន្ត្រៃចំនួន០១គ្រឿង,​ អង្ករចំនួន១០ការ៉ុង,​ ទូទឹកកកចំនួន០១គ្រឿង,​ ទូខោអាវចំនួន០៣ ,ទូកញ្ចក់ចំនួន០១, ទូឈើចំនួន០៣, ប្រាក់ខ្មែរចំនួន ១,១០០,០០០៛(មួយលានដប់ម៉ឺនរៀល),​ ខ្សែកមាសចំនួន១តម្លឹង ១ជី សរុបជាទឹកប្រាក់ទាំងអស់(លុយខ្មែរចំនួន ២,៦០០,០០០៛ (ពីរលានហុកសិបម៉ឺនរៀល) , លុយបាតចំនួន ៧៨.៨០០បាត (ប្រាំពីរម៉ឺនប្រាំបីពាន់ប្រាំបីរយបាត) លុយដុល្លារចំនួន ៤៤១០ដុល្លារ(បួនពាន់បួនរយដប់ដុល្លារ ) ផងដែរ។

មូលហេតុនៃការឆេះរហូតមកដល់ពេលនេះសមត្ថកិច្ចកំពុងស្រាវជ្រាវបន្ត៕