សម្តេចតេជោហ៊ុនសែនចេញអនុក្រឹត្យផ្តល់ប្រាក់ឧបត្ថម្ភ៥មុឺនរៀលដល់មន្ត្រីរាជការកម្លាំងប្រដាប់អាវុធក្នុងឱកាសបុណ្បចូលឆ្នាំថ្មី

សម្តេចតេជោ ហ៊ុន សែន ចេញអនុក្រឹត្យផ្តល់ប្រាក់ឧបត្ថម្ភ៥ម៉ឺនរៀល ដល់មន្ត្រីរាជការ កម្លាំងប្រដាប់អាវុធ ក្នុងឱកាសបុណ្យចូលឆ្នាំថ្មី

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី១៦ ខែមីនា ឆ្នាំ២០២០ បានចេញអនុក្រឹត្យស្តីពីការចាត់ចែងប្រាក់ឧបត្ថម្ភចំនួន៥ម៉ឺនរៀលដល់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ ក្នុងឱកាសបុណ្យចូលឆ្នាំថ្មី ឆ្នាំជូត ទោស័ក ពុទ្ធសករាជ២៥៦៣។

មាត្រា១ នៃអនុក្រឹត្យនេះ បានបញ្ជាក់ថា ថវិកាឧបត្ថម្ភនេះ ផ្តល់ជូនមន្ត្រីរាជការស៊ីវិលនៃក្រុមនីតិប្បញ្ញត្តិ នីតិប្រតិបត្តិ តុលាការ មន្ត្រីនគរបាលជាតិ មន្ត្រីពន្ធនាគារក្រសួងមហាផ្ទៃ យោធិននៃកងយោធពលខេមរភូមិន្ទ មន្ត្រីរាជការនៃអាជ្ញាធរសវនកម្មជាតិ មន្ត្រីរាជការនៃគណៈកម្មាធិការជាតិរៀបចំការបោះឆ្នោត មន្ត្រីខុទ្ទកាល័យរបស់នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងរដ្ឋលេខាធិការដែលជាប្រធានស្ថាប័ន ទីប្រឹក្សា ជំនួយការ លេខាធិការ និងទីប្រឹក្សា ជំនួយការ លេខាធិការ និងមន្ត្ត្រីជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្ត្រីនៃការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិ ប្រធានភូមិ អនុប្រធានភូមិ សមាជិកភូមិ មន្ត្រីជាប់កិច្ចសន្យា និងបុគ្គលិកអណ្តែតដែលកំពុងបម្រើការងារនៅថ្នាក់ជាតិ និងថ្នាក់ក្រោមជាតិ ព្រមទាំងនិវត្តជន ជនបាត់បង់សម្បទាវិជ្ជាជីវៈ ជនបាត់បង់សមត្ថភាពការងារ និងជនពិការដែលជាអតីតមន្ត្រីរាជការស៊ីវិល អតីតយោធិននៃកងយោធពលខមេរភូមិន្ទ និងអតីតមន្ត្រីនគរបាលជាតិកម្ពុជា។

ក្នុងមាត្រា១ ក៏បានបញ្ជាក់ថា ចំពោះគ្រួសារជនពលី និងគ្រួសារជនមរណៈជាអតីតយុទ្ធជនត្រូវបានផ្តល់ជូនប្រាក់ឧបត្ថម្ភចំនួន ៥ម៉ឺនក្នុងមួយគ្រួសារ។

មាត្រា២នៃអនុក្រឹត្យ បានកំណត់ថា ការបើកប្រាក់ឧបត្ថម្ភនេះ ត្រូវអនុវត្តន៍ឱ្យបានមុនថ្ងៃចូលឆ្នាំថ្មីប្រពៃណីជាតិ។ ការបើកប្រាក់នេះ ត្រូវអនុវត្តន៍តាមគណនីបៀវត្សរបស់សាមីជន ឬគ្រួសារជនពលី និងគ្រួសារជនមរណៈជាអតីតយុទ្ធជន។

សូមជម្រាបថា ដើម្បីជាលើកទឹកចិត្តដល់មន្ត្រីរាជការ និងកម្លាំងប្រដាប់អាវុធគ្រប់ប្រភេទនោះ រាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន តែងផ្តល់ប្រាក់ឧបត្ថម្ភ៥ម៉ឺនរៀលជូនមន្ត្រីរាជការ និងកងកម្លាំងប្រដាប់អាវុធគ្រប់ប្រភេទមួយឆ្នាំពីរដង គឺពេលបុណ្យចូលឆ្នាំ និងបុណ្យភ្ជុំបិណ្ឌ។ ប្រាក់ឧបត្ថម្ភក្នុងពិធីបុណ្យជាតិទាំងពីរនេះ មានចំនួនសរុបប្រហែលជា ១៤លានដុល្លារអាមេរិក៕