អាជ្ញាធរប្រកាសបិទចរាចរណ៍ផ្លូវជាតិ៤ត្រង់ស្ពានសំរោងក្នុងស្រុកកំពង់សីលា

ស្រុកកំពង់សីលា-អជ្ញាធរបានប្រកាសបិទចរាចរណ៍ជាបណ្តោះអាសន្នហើយ (សម្រាប់រថយន្តធំ) នៅល្ងាច ថ្ងៃ​ទី​០៤ ខែ​កញ្ញា​​ ឆ្នាំ​២០១៩នេះ ​ត្រង់ចំណុចស្ពានស្ទឹងសំរោង​ ចន្លោះ​គីឡូម៉ែត្រ​លេខ​ 115-116​ ផ្លូវជាតិលេខ៤ ក្នុង​ភូមិ​សាស្ត្រ​​ ឃុំអូរបាក់រទេះ​ ស្រុកកំពង់សីលា​ ខេត្តព្រះសីហនុ​ ដោយសារជំនន់ទឹកភ្លៀង បន្តហក់ឡេីងខ្ពស់។ មន្ត្រីថ្លែងថា កម្ពស់ ទឹកបានឡើងលិចស្ពានស្ទឹងសំរោង និងបានហូរកាត់ពីលើផ្លូវជាតិ ច្រើនរយម៉ែត្រ ដែលមិនអាចអោយរថយន្តធំ ធ្វើចរាចរណ៍ឆ្លងកាត់បានឡើយ ​ ស្របពេលដែលធាតុ​អាកាស ភ្លៀងនៅតែបន្តធ្លាក់ ។ ទោះជាយ៉ាងនេះក្តីរថយន្តតូចៗនៅអនុញ្ញាតអោយចរាចរណ៍បានក្នុងលក្ខខណ្ឌ័ប្រុងប្រយត្ន័ ហើយប្រសិនបើទឹកនៅតែបន្តហក់ឡើង យប់នេះរថយន្តតូចៗក៍នឹងត្រូវផ្អាកដែរ។
ចំពោះមុខស្ថានភាពបែបនេះ ​គណបញ្ជាការឯកភាពរដ្ឋបាលស្រុកកំពង់សីលា​ បានដាក់បន្ថែមកម្លាំងប្រចាំការត្រួតពិនិត្យ រក្សាសុវត្ថិភាពទូទៅនិងសម្រួលការងារផ្សេងៗជូនពលរដ្ឋនិងអ្នកដំណើរនៅចំណុចនោះ រហូតដល់ទឹកស្រកឡើងវិញ ៕