សន្តិសុខសង្គម

ក្រោយពីក្រសួងវប្បធម៌បានសម្រេចប្រគល់សិទ្ធិគ្រប់គ្រងមរតកសាសន៍នូវបទចម្រៀងរបស់លោក គង្គ ប៊ុនឈឿន ចំនួន៥៥បទរួចមក។លោក ពេជ អង្គ ជាមេធាវីរបស់លោកស្រី គាត គឹមលន ភរិយា កវី គង្គ ប៊ុនឈឿន បានចេញសេចក្តីប្រកាសមួយកាលពីម្សិលមិញព្រមទាំងព្រមានចាត់វិធានការតាមផ្លូវចំពោះអ្នកលួចចម្លងបទចម្រៀងដែលជាស្នាដៃនិពន្ធរបស់លោក គង្គ ប៊ុនឈឿន។ សេចក្តីប្រកាសព័ត៌មាននៅថ្ងៃទី៣០វិច្ឆិកាឆ្នាំ២០១៩ លោក ពេជ អង្គ ជាមេធាវីរបស់លោកស្រី គាត គឹមលន ភរិយា កវី គង្គ ប៊ុនឈឿន បានកត់សំគាល់ថា កន្លងមក និងពិសេសនៅពេលថ្មីៗនេះ មានការរំលោភសិទ្ធិលើបទចម្រៀងដែលស្ថិតក្រោមការគ្រប់គ្រងរបស់ភរិយា លោក គង្គ ប៊ុនឈឿន ។ ជាការធ្វើអាជីវកម្មខុសច្បាប់ យកទៅចម្លងឡើងវិញ កែឃ្លាឃ្លោង កែភ្លេង ដោយធ្វើអាជីវកម្មតាម Youtube ឬប្រព័ន្ធផ្សព្វផ្សាយសាធារណៈនានាដោយគ្មានការយល់ព្រមពីម្ចាស់សិទ្ធិគ្រប់គ្រង។ ទង្វើនេះ ត្រូវបានលោកមេធាវីបញ្ជាក់ថា បានរំលោភលើច្បាប់ស្តីពីសិទ្ធិអ្នកនិពន្ធឬសិទ្ធិប្រហាក់ប្រហែលឆ្នាំ២០០៣ និងសិទ្ធិបេតិកភណ្ឌឬសិទ្ធិសីលធម៌របស់លោកស្រី គាត គឹមលន ដែលធ្វើលោកស្រី មានការឈឺចាប់ និងជាការប្រមាថដល់ការខិតខំប្រឹងប្រែងស្ទើរពេញមួយជីវិតរបស់កវី គង្គ ប៊ុនឈឿន។លោក ពេជ អង្គ បានបញ្ជាក់បន្ថែមថា «ការនិពន្ធជាការខំប្រឹងដោយបញ្ញាស្មារតី ប្រកបដោយការច្នៃប្រឌិតខ្ពស់ ដែលគួរឲ្យគោរព។ ដូច្នេះមិនគួររំលោភសិទ្ធិរបស់អ្នកនិពន្ធ ទោះដោយហេតុផលណាមួយឡើយ»។យ៉ាងណាក៏ដោយ លោក ពេជ អង្គ បានផ្តល់ឱកាសដល់អ្នកដែលមានបំណងទទួលសិទ្ធិធ្វើអាជីវកម្ម ការផលិតឡើងវិញក្នុងទម្រង់ណាមួយលើស្នាដៃ លោក គង្គ ប៊ុនឈឿន គឺអាចពិភាក្សាជាមួយ លោកស្រី គាត គឹមលន ឬមេធាវីតំណាង។ ប៉ុន្តែលោកមេធាវីដដែលបានស្នើឲ្យមានការបញ្ឈប់ជាបន្ទាន់ចំពោះការលួចចម្លងស្នាដៃបទចម្រៀងរបស់លោក គង្គ ប៊ុនឈឿន ទៅធ្វើអាជីវកម្មឬចែកចាយ បើពុំនោះទេលោកនឹងចាត់វិធានការតាមផ្លូវច្បាប់។សូមបញ្ជាក់ដែរថាលោក គង្គ ប៊ុនឈឿន គឺជាកវីនិពន្ធល្បីឈ្មោះមួយរូបតាំងពីទសវត្សរ៍ទី៥០ លោកមានជំនាញទាំងផ្នែកបទចម្រៀង ភាពយន្ត និងសិល្បៈមួយចំនួនទៀត។ លោកលោក គង្គ ប៊ុនឈឿន បានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់ ដែលច្រើនសរសេរបង្ហាញអំពីតថភាពពិតនៅក្នុងសង្គមជាតិ រហូតដល់លោកបានរត់គេចពីការតាមចាប់ខ្លួនពីរដ្ឋាភិបាលទៅនៅក្រៅប្រទេសរហូតដល់ថ្ងៃទទួលមរណភាពក្នុងវ័យ ៧៧ឆ្នាំនៅប្រទេសន័រវេសន៍ (Norway) ដោយជំងឺមហារីកកាលពីឆ្នាំ២០១៦៕