សាហាវណាស់!!!ខ្មាន់កាំភ្លើង៣នាក់បាញ់ស្ត្រីជនជាតិចិនបុគ្គលិកកាស៊ីណូម្នាក់ស្លាប់ក្នុងថ្លុកឈាម

ខេត្តព្រះសីហនុ៖ កាលពីវេលាម៉ោង ១១.៣០នាទីយប់ថ្ងៃទី ២៣ខែកក្តដា ឆ្នាំ២០១៩ មានករណីបាញ់សម្លាប់ស្ត្រីជនជាតិចិនម្នាក់ នៅចំណុចភូមិ០៣ សង្កាត់០៣ ក្រុងព្រះសីហនុ ហើយករណីនេះត្រូវបានសមត្ថកិច្ចនគរបាលខេត្តព្រះសីហនុ បញ្ជាក់ថា បង្កឡើងដោយក្រុមជនសង្ស័យជនជាតិចិនដូចគ្នា មិនស្គាល់អត្តសញ្ញាណចំនួន០៣នាក់។

ជនរងគ្រោះឈ្មោះ Zhang Dan ភេទស្រី អាយុ២៥ឆ្នាំ ជនជាតិចិន មុខរបរ បុគ្គលិកកាស៊ីណូអ៊េសវី ផ្នែកនាំភ្ញៀវ មានទីលំនៅភូមិ៣ សង្កាត់៣ ក្រុងព្រះសីហនុ ។

តាមប្រភពព័ត៌មានបានអោយដឹងថា ខណៈពេលដែលជនរងគ្រោះ និងមិត្តភក្តិប្រុសឈ្មោះ Xiao LiZhi ជនជាតិចិន ដើរចេញពីក្នុងកាស៊ីណូ អ៊េសវី (កន្លែងធ្វើការ) សំដៅទៅកន្លែងហាងលក់ទំនិញមួយកន្លែង ឈ្មោះ គ័រជីអ៊ិហាវ ពេលដើរដល់ចំណុចផ្លូវបត់មួយកន្លែង ជិតដល់ហាងកាហ្វេឈ្មោះ ៨៨១១ ក៏ឃើញមានរថយន្ត១គ្រឿងចតនៅទីនោះ បន្ទាប់មកស្រាប់តែមានជនជាតិ២នាក់ ភេទប្រុស ចុះមកពីលើរថយន្តហើយបម្រុងចាប់អូសជនរងគ្រោះ និងមិត្តប្រុសចូលក្នុងរថយន្ត តែពេលនោះជនរងគ្រោះបានរើបម្រាស់ ក្រោយមកក៏មានការផ្ទុះអាវុធ បណ្តាលឲ្យត្រូវជនរងគ្រោះភេទស្រី ត្រង់កញ្ចឹងកខាងឆ្វេង សំដៅមកគល់ដោះខាងស្តាំ ធ្វើឲ្យស្លាប់ភ្លាមៗនៅកន្លែងកើតហេតុ។ បន្ទាប់មកក្រុមជនសង្ស័យ បានជិះរថយន្តរត់គេចខ្លួនបាត់។

បច្ចុប្បន្នមិត្តប្រុសរបស់ជនរងគ្រោះ កំពុងត្រូវបានសមត្ថកិច្ចធ្វើការសួរនាំនៅការិយាល័យ នគរបាលព្រហ្មទណ្ឌកម្រិតស្រាល។ ចំពោះជនសង្ស័យ កម្លាំងជំនាញផែននគរបាលព្រហ្មទណ្ឌ បានសហការជាមួយជំនាញពាក់ព័ន្ធ ធ្វើការស្រាវជ្រាវដើម្បីតាមចាប់ខ្លួនមកផ្តន្ទាទោសតាម៕