បង្ក្រាបបានមុខសញ្ញាចែកចាយគ្រឿងញៀន ចំនួន០៤នាក់ និង គ្រឿងញៀនមួយចំនួន ក្នុងខណ្ឌដូនពេញ!

ភ្នំពេញ ៖ កាលពីនៅថ្ងៃទី២៣ ខែតុលា ឆ្នាំ២០១៩ វេលាម៉ោង០១ និង០០នាទី សមត្ថកិច្ចខណ្ឌដូនពេញ បានចុះប្រតិបត្តិការ បង្ក្រាបបករណីជួញដូរ និងរក្សាទុកប្រើប្រាស់ដោយខុសច្បាប់នូវសារធាតុញៀន ស្ថិតនៅចំណុចក្រោមដើមគរ ផ្លូវរថភ្លើង ក្រុម៣៩ ភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ​ ដោយខ្លួនបានជនសង្ស័យចំនួន០៤នាក់។

សមត្ថកិច្ចបញ្ជាក់ថា ជនសង្ស័យទាំង០៤នាក់រួមមាន ៖ ទី១ ឈ្មោះ ហ៊ឹម សុផាត ភេទប្រុស អាយុ៣៦ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ(រក្សាទុក) ទី២ ឈ្មោះ អេង រស្មី ភេទប្រុស អាយុ២៦ឆ្នាំ ជនជាតិខ្មែរ ស្នាក់នៅ និងមុខរបរមិនពិតប្រាកដ(ប្រើប្រាស់) ទី៣ ឈ្មោះ សៅ យានវិចិត្រ ភេទប្រុស អាយុ៣០ឆ្នាំ ជនជាតិខ្មែរ ស្នាក់នៅ និងមុខរបរមិនពិតប្រាកដ(ប្រើប្រាស់) និងទី៤ ​ឈ្មោះ សួន បូរ៉ា ភេទប្រុស អាយុ៣៨ឆ្នាំ ជនជាតិខ្មែរ ស្នាក់នៅ ទីតាំងខាងលើ មុខរបរមិនពិតប្រាកដ(ប្រើប្រាស់)។

សមត្ថកិច្ចបន្តថា ចំពោះវត្ថុតាងដែលដកហូតបានរួមមាន៖ ក្រាមពណ៌សថ្លាសង្ស័យជាគ្រឿងញៀនចំនួន១៤កញ្ចប់(មានកញ្ចប់ធំចំនួន០១ ជារបស់ជនសង្ស័យឈ្មោះ សី ភេទប្រុស អាយុ ២៤ឆ្នាំ (បានរត់គេចខ្លួន),​ក្រាមពណ៌សថ្លាសង្ស័យជាគ្រឿងញៀនចំនួន០១កញ្ចប់តូច(ជារបស់ឈ្មោះ ហ៊ឹម សុផាត) និងថង់សំរាប់ច្រកគ្រឿងញៀនមួយចំនួន ទៀត។

បច្ចុប្បន្នជនសង្ស័យទាំង០៤នាក់ខាងលើ សមត្ថកិច្ចកំពុងសាកសួរចម្លើយបន្តស្រាវជ្រាវរកបក្ខពួក និងក្រុមដទៃផ្សេងទៀត ព្រមទាំងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី៕