លទ្ធផលស្រវឹងជោគជាំបេីកបរបុករះរថយន្តជាច្រើនគ្រឿងបណ្ដាលឲ្យរងរបួស 6 នាក់

ភ្នំពេញ​ ៖​ យុវជនម្នាក់ទំនងជាស្រវឹង បានបើកបររថយន្តក្នុងល្បឿនលឿន ជ្រុលបុកយានយន្តជាច្រើនគ្រឿង និងរងរបួស៦នាក់កាលពីវេលា ម៉ោង២និង១០នាទីយប់ រំលងអធ្រាត្រ ឈានចូលថ្ងៃអាទិត្យ​ ទី២៧​ ខែតុលា​ ឆ្នាំ២០១៩ នៅចំណុចសួនច្បារ​មុខវត្តបទុមវតី​ ( មុខភោជនីយដ្ឋាន ផ្ទះម៉ែក្មេក) លេីផ្លូវសុធារស​ ស្ថិតក្នុងសង្កាត់ចតុមុខ ខណ្ឌដូនពេញ​ រាជធានីភ្នំពេញ​ ។

រថយន្តបង្ក កាមរីហៃប្រីត​ ពណ៌ស​ ពាក់ស្លាកលេខ ភ្នំពេញ​ 2AF-7942 បេីកបរដោយ​​បុរសម្នាក់ទំនងស្រវឹងស្រា និងម្នាក់ទៀតជាអ្នករួមដំណេីរ ទំនងមានជាតិសុរាក្នុងខ្លួនដូចគ្នា ។ រីឯយានយន្តខូចខាត រួមមានរថយន្ត កាមរី​ឆ្លាមមួយគ្រឿង​និងម៉ូតូ៣គ្រឿង និងមនុស្សរបួសធ្ងន់ម្នាក់ របួសស្រាល៥នាក់ ។

ប្រភពពីកន្លែងកើតហេតុបានឲ្យដឹងថា​ នៅមុនពេលកើតហេតុ​ គេបានឃើញរថយន្តបង្កបើកបរក្នុងល្បឿនខ្លាំង ក្នុងទិសដៅបញ្ច្រាសមកប៉ះជាមួយម៉ូតូ១គ្រឿងដែលជិះគ្នា៣នាក់ បណ្ដាលដួលរងរបួស ។ បន្ទាប់មករថយន្តបង្ក បានបន្តបើកបរបញ្ច្រាស រ៉េមកបុកម៉ូតូ២គ្រឿងឈប់មុខហាងផ្ទះម៉ែក្មេក រួចរុញផ្ទប់រថយន្តកាមារីឆ្លាម បណ្ដាលឱ្យមនុស្ស៣នាក់អង្គុយលើម៉ូតូ របួសធ្ងន់ម្នាក់របួសស្រាលម្នាក់ ។

ក្រោយមកគេឃេីញ​ រថយន្តគិលានសង្គ្រោះ​របស់មន្ទីរសម្រាកព្យាបាល​ សម្ភព​រស្មី​ បានមកដឹកបញ្ជូនទៅកាន់មន្ទីរពេទ្យភ្លាមៗ​ ចំណែកអ្នកបេីករថយន្តបង្ក​ បានហៅមិត្តភក្តិ សាច់ញាតិប្រុសស្រីមក​កន្លែងកេីតហេតុ​ ស្រាប់តែកេីតមានភាពច្របូកច្របល់​ រវាងប្រជាពលរដ្ឋ និង​ភាគី​រថយន្តបង្ក​ ។ ភាគីក្រុមរងគ្រោះ បានលើកដៃសំពះសមត្ថកិច្ច អរគុណសម្រាប់កិច្ចអន្តរាគមន៍ និងសុំរកតែយុត្តិធម៌ជូនពួកគាត់តែប៉ុណ្ណោះ ។

ក្រោយពេលកើតហេតុ​ សមត្ថកិច្ចវាស់វែងយករថយន្តបង្កនិងម៉ូតូរងគ្រោះ ព្រមទាំងអ្នកបើករថយន្តបង្កយកទៅរក្សាទុកនៅការិយាល័យចរាចរណ៏ផ្លូវគោករាជធានីភ្នំពេញ រង់ចាំដោះស្រាយគ្នានៅពេលក្រោយ៕