រថយន្តបែនដឹកដីបេីកបរមិនប្រយ័ត្នប៉ះជាមួយម៉ូតូធូដេពេញទំហឹងរួចកិនបុរសម្នាក់ស្លាប់នៅនឹងកន្លែងភ្លាមៗ

ភ្នំពេញ ៖ បុរសម្នាក់បានបាត់បង់ជីវិតភ្លាមៗ បន្ទាប់ពីជិះម៉ូតូ ទៅប៉ះជាមួយរថយន្តបែនដឹកដី ហើយត្រូវរថយន្តកិន កាលពីវេលាម៉ោង១០និង២០នាទីយប់ ថ្ងៃសុក្រ ទី១៧ ខែមករា ឆ្នាំ២០២០ ត្រង់ចំណុចមុខ ផ្សារស្ទឹងមានជ័យចាស់ នៅក្នុងសង្កាត់ ស្ទឹងមានជ័យទី២ខណ្ឌមានជ័យ រាជធានីភ្នំពេញ ។

ជនរងគ្រោះដែលស្លាប់ មិនទាន់ស្គាល់អត្តសញ្ញាណនោះទេ ជិះម៉ូតូម៉ាកធូដេ ពណ៌ក្រហមលាយស ពាក់ស្លាកលេខ ភ្នំពេញ 1GV-0473 រីឯរថយន្ត ជាប្រភេទរថយន្តដឹកដី ធន់ធំ ពណ៌ស ពាក់ស្លាកលេខ ព្រះសីហនុ3A-2810 បើកបរដោយឈ្មោះ តាំង ពិសិទ្ធភេទប្រុស អាយុ២៧ឆ្នាំ។

សាក្សីបានឲ្យដឹងថា មុនពេលកើតហេតុ គេឃើញបុរសរងគ្រោះ ជិះម៉ូតូម្នាក់ឯង តាមបណ្ដោយផ្លូវ ២១៧ទិសដៅពីលិចមកកើត ក្នុងល្បឿនល្មម រីឯរថយន្តបែនដឹកដី ជិះស្របទិសគ្នាពីក្រោយ ខណៈមកដល់ចំណុចកើតហេតុ រថយន្តបានវ៉ាខាងឆ្វេងដៃ ធ្វើឱ្យប៉ះដៃចង្កូតម៉ូតូដួល រួចកិន បុរសរងគ្រោះតែម្ដង ។ តៃកុងរថយន្ត ត្រូវពលរដ្ឋដេញឃាត់បាន រួចប្រគល់ឲ្យសមត្ថកិច្ច ប៉ុស្តិ៍ស្ទឹងមានជ័យទី២ យកទៅសួរនាំ។

ក្រោយពីកើតហេតុ សមត្ថកិច្ចវាស់វែង យករថយន្តនិងម៉ូតូទៅរក្សាទុក រង់ចាំដោះស្រាយគ្នានៅពេលក្រោយ ចំណែកសាកសពតម្កល់ទុកនៅវត្តទឹកថ្លា រង់ចាំស្រាវជ្រាវរកសាច់ញាតិ ៕