បុរសម្នាក់បើករថយន្ត Toyota Prius មិនប្រយ័ត្នជ្រុលទៅបុកទម្លុះចូលផ្ទះពលរដ្ឋ លក់គ្រឿងភេសជ្ជៈ

បុរសម្នាក់បើករថយន្ត Toyota Prius មិនប្រយ័ត្នជ្រុលទៅបុកទម្លុះចូលផ្ទះពលរដ្ឋ លក់គ្រឿងភេសជ្ជៈ

(រាជធានីភ្នំពេញ ) ៖ រថយន្ត Toyota Priusមួយគ្រឿងបើកបរដោយបុរសម្នាក់ក្នុងល្បឿន មិនប្រយ័ត្នក៏បានជ្រុលចង្កូតទៅបុកទម្លុះចូលផ្ទះពលរដ្ឋ រងការខូចខាតទ្វារនិងសម្ភារៈមួយចំនួននៅក្នុងផ្ទះ។

ហេតុការណ៍គ្រោះថ្នាក់ចរាចរណ៍ខាងលើនេះដែរ បង្កឲ្យមានការភ្ញាក់ផ្អើលកាលពីវេលាម៉ោង ១២:៣០នាទីរំលងអធ្រាត្រឈានចូលថ្ងៃទី ១៥ ខែកុម្ភៈឆ្នាំ ២០២៤ លើផ្លូវ ១៩៨០កែងផ្លូវ១០១១ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

យោងតាមការបញ្ជាក់ពីបងប្អូនប្រជាពលរដ្ឋដែលនៅកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញបុរសម្នាក់ បានបើករថយន្តម៉ាក Toyota prius ពណ៌ប្រផេះមួយគ្រឿងពាក់ផ្លាកលេខ ភ្នំពេញ2BX-3920 ធ្វើដំណើរតាមបណ្ដោយផ្លូវ ១៩៨០ ក្នុងទិសដៅពីកើតមកលិច ក្នុងល្បឿនលឿន ខណៈពេលបើកមកដល់ត្រង់ចំណុចកើតហេតុផ្លូវបំបែកជាបី ក៏បួងចង្កូតបត់តែមិនផុតក៏ជ្រុលចង្កូតទៅបុកទម្លុះ ចូលផ្ទះពលរដ្ឋលក់គ្រឿងភេសជ្ជៈបណ្ដាលឲ្យខូចខាតថូផ្កាមួយនិងទ្វាររូត រួមទាំងទ្វារកញ្ចក់និងសម្ភារៈលក់ដូរក្នុងផ្ទះមួយចំនួន ។ សំណាងល្អមិនបង្កឲ្យមានគ្រោះថ្នាក់ ទៅដល់មនុស្ស ចំណែកអ្នកបើកបរសមត្ថកិច្ចឃាត់បាននៅកន្លែងកើតហេតុតែម្តង។

បន្ទាប់ពីកើតហេតុសមត្ថកិច្ចមូលដ្ឋាន ចុះមកដល់ពិនិត្យជុំវិញទីតាំងរួចក៏បានទាក់ទង ទៅខាងជំនាញឲ្យចុះមកវាស់វែងធ្វើកំណត់ហេតុដោយយករថយន្ត ទៅរក្សាទុករងចាំឲ្យភាគីម្ចាស់រថយន្តដោះស្រាយ ជាមួយនឹងខាងម្ចាស់ផ្ទះ៕