សម្តេចនាយករដ្ឋមន្ត្រី ហ៊ុន សែន ចេញអនុក្រឹត្យកំណត់របៀបរបបការងារ របស់អង្គភាពអ្នកនាំពាក្យរាជរដ្ឋាភិបាល…..

អនុក្រឹត្យស្តីពីការរៀបចំ និងការប្រព្រឹត្តទៅនៃអង្គភាពអ្នកនាំពាក្យរាជរដ្ឋាភិបាលកម្ពុជា ត្រូវបានសម្តេចតេជោ ហ៊ុន សែន ចុះហត្ថលេខាដាក់ឱ្យអនុវត្តន៍នៅថ្ងៃទី១៥ ខែសីហា ឆ្នាំ២០១៩កន្លងទៅនេះ។ អនុក្រឹត្យនេះមានចំនួន ៧ជំពូក និង១៤មាត្រា។

យោងតាមអនុក្រឹត្យដែល អង្គភាពសារព័ត៌មានខ្មែរឯករាជ្យទទួលបាននៅព្រឹកនេះ  បានបញ្ជាក់ថា ការបង្កើតអង្គភាពអ្នកនាំពាក្យរាជរដ្ឋាភិបាល ដើម្បីប្រសិទ្ធភាពនៃការងារព័ត៌មានជូនដល់សាធារណជនជាតិ និងអន្តរជាតិអំពីការងារ សមិទ្ធផល និងគោលនយោបាយរបស់រាជរដ្ឋាភិបាល។

ក្នុងអនុក្រឹត្យបានបញ្ជាក់ផងដែរថា សមាសភាពរបស់អង្គភាពអ្នកនាំពាក្យរាជរដ្ឋាភិបាលមានឥស្សរជនមួយរូបទទួលបន្ទុកលើកិច្ចការនាំពាក្យរាជរដ្ឋាភិបាលជាប្រធានអង្គភាព និងអ្នកនាំពាក្យតាមក្រសួងស្ថាប័ននីមួយៗជាអនុប្រធាន និងសមាជិក ដែលកំណត់ដោយសេចក្តីសម្រេចរបស់រាជរដ្ឋាភិបាល។ អង្គភាពអ្នកនាំពាក្យរាជរដ្ឋាភិបាលមានទីប្រឹក្សា និងក្រុមជំនួយការ ហើយអនុប្រធាន និងសមាជិកត្រូវបំបេញការងារតាមការកំណត់របស់ប្រធាន៕