កំពង់ធំ ៖ ជនសង្ស័យ៤នាក់ ក្នុងនោះមានជនជាតិថៃម្នាក់ ពាក់ព័ន្ធករណីជួញដូរគ្រឿងញៀនឆ្លងដែន ត្រូវបានកម្លាំងនគរបាលមន្ទីរគ្រឿងញៀន នៃអគ្គស្នងការនគរបាលជាតិ សហការជាមួយកម្លាំងនគរបាល នៃស្នងការដ្ឋាននគរបាលខេត្តកំពង់ធំ ដោយមានការសម្របសម្រួលពីលោកអ៉ិត សុធា ព្រះរាជ្ញាអមសាលាដំបូងខេត្តកំពង់ធំ ឃាត់ខ្លួនបាន ជាមួយថ្នាំញៀន៤០គីឡូក្រាម ។ ប្រតិបត្តិការនេះ បានធ្វើឡើងនៅវេលាម៉ោង២និង៣០នាទី រសៀល ថ្ងៃទី២១ ខែតុលា ឆ្នាំ២០១៩ នៅចំណុចភូមិសំណាក ឃុំកកោះ ស្រុកសន្ទុក ខេត្តកំពង់ធំ ។ ដកហូតវត្ថុតាងរួមមាន គ្រឿងញៀនប្រភេទម៉េតំហ្វេតាមីនICE ចំនួន៤០កញ្ចប់ ទម្ងន់ប្រមាណ៤០គីឡូក្រាម, រថយន្ត២គ្រឿង។ មន្ត្រីនគរបាលខេត្តកំពង់ធំ បានឱ្យដឹងថា ជនសង្ស័យទាំង៤នាក់នោះរួមមាន៖ទី១-ឈ្មោះ SAk SAESONG អាយុ៣២ឆ្នាំ ជនជាតិថៃ, ទី២-ឈ្មោះ សុខ ប៊ុនសិរិឆ័យ អាយុ៤២ឆ្នាំ ជនជាតិខ្មែរ, ទី៣-ឈ្មោះ លី តឹក អាយុ៥៣ឆ្នាំ ជនជាតិខ្មែរ និងទី៤-ឈ្មោះ គង់ វណ្ណៈ អាយុ៤០ឆ្នាំ ជនជាតិខ្មែរ។ មន្ត្រីនគរបាលនៃមន្ទីរគ្រឿងញៀន បានឱ្យដឹងថា កម្លាំងជំនាញបានស្រាវជ្រាវនិងតាមដានក្រុមជនសង្ស័យជាងមួយខែមកហើយ រហូតដល់រសៀលថ្ងៃទី២១នេះ សមត្ថកិច្ចបានសហការគ្នាបង្ក្រាបជាក់ស្តែងតែម្តង។ ប្រភពដដែលបន្តថាយោងតាមចម្លើយសារភាពរបស់ជនសង្ស័យបានឱ្យដឹងថាគ្រឿងញៀនខាងលើ នាំចូលពីថៃ មកកម្ពុជាតាមច្រកជាំ អូរស្មាច់ ខេត្តឧត្ដរមានជ័យ។ បច្ចុប្បន្នជនសង្ស័យទាំង៤នាក់ រួមជាមួយវត្ថុតាងកំពុងបានបញ្ជូនទៅស្នងការដ្ឋាននគរបាលខេត្តកំពង់ធំ ដើម្បីសាកសួរយកចម្លើយនិងកសាងសំណុំរឿងដើម្បីចាត់ការតាមនីតិវិធី ៕
